ជួបជាមួយលោក យឹម ផល្លី អ្នកជំនាញផលិតគំនូរជីវចល 3D
លោក ផល្លី បានបញ្ចប់ការសិក្សាថ្នាក់អនុបណ្ឌិតខាងផ្នែក MIS (Management Information System) ពីវិទ្យាស្ថានស៊ីតិកកាលពីឆ្នាំ ២០០៧ ។
លោកបានបញ្ជាក់ថែមទៀតថា មុខជំនាញដែលលោកបានសិក្សាពុំមានទំនាក់ទំនងជាមួយនឹងគំនូរជីវចល 3D ឡើយ។
លោកបានរៀននូវជំនាញមួយនេះតាមរយៈលោកគ្រូស្ម័គ្រចិត្តមកពីប្រទេសបារាំងម្នាក់ ដោយពេលនោះមិត្តភក្តិរបស់លោកជាអ្នកបបួលលោកទៅរៀន ចំនែកឯការរៀននាពេលនោះគឺមានរយៈពេលខ្លីដោយលោករៀនត្រឹមចំណេះដឹងជាមូលដ្ឋានអំពី 3D Animation តែប៉ុណ្ណោះ ក្រៅពីនោះលោកធ្វើការស្រាវជ្រាវ និង រៀនដោយខ្លួនឯងតាមប្រព័ន្ធអ៊ីនធឺណិត។
លោក ផល្លី ក៏បានបញ្ជាក់ដែរថា៖ «គំនូរ 3D គឺជារូបរបស់វត្ថុឬតួអង្គដែលយើងគូរឡើងនៅលើកុំព្យូទ័រដោយប្រើប្រាស់នូវវ៉ិចទ័របីផ្សេងគ្នា ហើយអាចឲ្យយើងមើលឃើញបានគ្រប់ជ្រុងទាំងអស់នៃរូបទាំងនោះរួមមានចំពីមុខចំហៀង និង ពីក្រោយ។ គំនូរ 3D ខុសពីគំនូរ 2D ដោយសារតែរូបដែលយើងគូរតាម 2D អាចមើលឃើញត្រឹមតែមួយប្លង់ប៉ុណ្ណោះខុសពី 3D ដែលអាចឲ្យយើងមើលឃើញរូបបានច្រើនប្លង់ខុសគ្នា”។
ពាក់ព័ន្ធទៅនឹងការចាប់យកអាជីពជាអ្នកផលិតគំនូរជីវចលបែប 3D នេះលោកប្រាប់ថាលោកបានធ្វើការទាក់ទងជាមួយផ្នែកនេះអស់រយៈពេលប្រមាណជាជិត ១០ ឆ្នាំមកហើយដោយលោកបានចំណាយពេល ២ ឆ្នាំនៅក្នុងការរៀនក៏ដូចជាការអនុវត្ត និង ៨ ឆ្នាំទៀតគិតចាប់ពីពេលដែលលោកបង្កើតជាក្រុមហ៊ុនធ្វើអាជីវកម្មទៅលើប្រភេទគំនូរ 3D មួយនេះមក។
លោកផល្លីបានបង្ហាញពីមូលហេតុដែលលោកចាប់យកអាជីពជាអ្នកបង្កើតគំនូរជីវចល 3D នេះថា៖ “កាលពីខ្ញុំចាប់ផ្តើមរៀនដំបូងខ្ញុំមិនដឹងថាកម្មវិធីផលិត 3D នោះជាអ្វីផង។
ប៉ុន្តែនៅពេលដែលខ្ញុំចាប់ផ្តើមរៀនពីវាខ្ញុំក៏មានអារម្មណ៍សប្បាយចិត្តហើយនេះគឺជាកត្តាជំរុញទឹកចិត្តមួយអោយខ្ញុំខិតខំសិក្សាស្វែងយល់ពីវា និងចង់ចាប់យកវាជាទុនដើម្បីបើកជាអាជីវកម្មទៅថ្ងៃក្រោយ”។
ក្នុងការបង្កើតគំនូរជីវចល 3D លោកផល្លីបានឲ្យដឹងថាដើម្បីផលិតវាបានកម្មវិធីកុំព្យូទ័រសំខាន់ៗដែលលោកត្រូវប្រើរួមមាន Autodesk Maya, Adobe AfterEffects, AutoCAD, Autodesk 3DMax, និង Google Sketchup ជាដើម។
ក្រៅពីកម្មវិធីកុំព្យូទ័រទាំងនេះ Motion Capture គឺជាឧបករណ៍សំខាន់មួយទៀតដែលលោកប្រើប្រាស់សម្រាប់ជាជំនួយក្នុងការបង្កើតគំនូរជីវចល 3D។
តាមរយៈម៉ាស៊ីនមួយនេះ លោកអាចថតយកសកម្មភាពរបស់មនុស្សដាក់បញ្ចូលទៅលើរូបដែលលោកបានបង្កើតឡើងនៅក្នុងកុំព្យូទ័រ។
លោកបានបញ្ជាក់ថាអតិថិជនដែលចាប់អារម្មណ៍ទៅលើការបង្កើតគំនូរជីវចល 3D របស់លោករួមមានក្រុមហ៊ុនឯកជនក្រសួងអង្គការដែលចង់ផ្សព្វផ្សាយពីការអប់រំផលិតផលឬសេវាកម្មរបស់គេជាដើមដែលជាសរុបមិនតិចជាង ២០ ស្ថាប័នឡើយ។
ទាកទិនទៅនឹងពេលវេលានៃការធ្វើក៏ដូចជាប្រាក់ចំណូលដែលទទួលបាន លោក ផល្លី បានប្រាប់ថាសម្រាប់ស្ប៉តពាណិជ្ជកម្មខ្លីៗ លោកចំណាយពេលត្រឹមតែ ១ ខែតែប៉ុណ្ណោះ។
ដោយឡែក ចំពោះការងារដែលធំៗលើសពីនោះអាចនឹងត្រូវចំណាយពេលវេលារហូតដល់ទៅកន្លះឆ្នាំទើបអាចចប់សព្វគ្រប់។ រីឯតម្លៃនៃការផលិត លោកអាចទទួលបានចាប់ពី៥០០ដុល្លាររហូតដល់ទៅ ៥០,០០០ ដុល្លារ អាស្រ័យទៅតាមប្រភេទ និងទំហំនៃការងារ។
ជាចុងក្រោយលោកផល្លីបានបញ្ជាក់ថា៖ «បច្ចេកទេស 3D ពិតជាមានសារៈសំខាន់ខ្លាំងណាស់នៅក្នុងការបង្កើតខ្សែភាគយន្តនាសម័យបច្ចុប្បន្ន ពីព្រោះវាអាចជួយឲ្យអ្វីដែលជាការស្រមើស្រមៃរបស់អ្នកនិពន្ធក្លាយជាការពិត។
ជាមួយនឹងបច្ចេកទេស 3D ការតាក់តែងសរសេរសាច់រឿងរបស់អ្នកនិពន្ធនឹងកាន់តែមានភាពអស្ចារ្យឡើងដែលញ៉ាំងធ្វើឲ្យសាច់រឿងទាំងមូលរឹតតែគួរឲ្យចង់ទស្សនាថែមទៀត»៕
