ស្ថាបនិកកម្មវិធីហ្គេមខ្មែរលើឆាកអន្តរជាតិ
លោក អៀ អ៊ុយ ហៅ ល្វីស ជាអ្នកបង្កើតកម្មវិធីហ្គេម និងសហស្ថាបនិក នាយកផ្នែកសិល្បៈ ជីវ៉ាល់រី យុគ Scott Howes
ជាមួយនឹងការអញ្ជើញលោកទៅចូលរួមកិច្ចប្រជុំបច្ចេកវិទ្យា និងពិព័រណ៍នៅទីក្រុងតូក្យូស្ថានទូតអាមេរិកនៅកម្ពុជា និងទីស្នាក់ការនៃបណ្ដុំបច្ចេកវិទ្យានៅតំបន់ស៊ីលីកូន វ៉ាលី សហរដ្ឋអាមេរិកនោះស្ថាបនិកស្ទូឌីយោបង្កើតកម្មវិធីហ្គេមដំបូងបង្អស់នៅកម្ពុជារូបនេះពិតជាមមាញឹកណាស់។
កាលពី២សប្ដាហ៍មុន លោក ល្វីស ដែលមានវ័យ៣០ឆ្នាំ បានទៅអាមេរិកបន្ទាប់ពីលោកបានជាប់ជ័យលាភីក្នុងចំណោមអ្នកឈ្នះ៥នាក់នៃការប្រកួត DEMO អាស៊ានឆ្នាំ២០១៣។
ការប្រកួតរយៈពេល២ថ្ងៃនៅទីក្រុងហូជីមិញ ប្រទសវៀតណាម បានប្រមូលផ្ដុំនូវអ្នកពូកែបច្ចេកវិទ្យាកុំព្យូទ័រ អ្នកវិនិយោគ និងសហគ្រិនដែលធ្វើអាជីវកម្មលើវិស័យបច្ចេកវិទ្យា។
ក្រៅពីមានការតាំងបង្ហាញនូវផលិតផលបច្ចេកវិទ្យាថ្មីៗ កម្មវិធីក៏មានសិក្ខាសាលាដែលថ្លែងដោយអ្នកគ្រប់គ្រងរបស់ក្រុមហ៊ុនកុំព្យូទ័រធំៗផងដែរ។
ទោះជាកម្មវិធីប្រជុំអ្នកបច្ចេកវិទ្យា DEMO បានប្រារព្ធនៅសហរដ្ឋអាមេរិកអស់២២ឆ្នាំមកហើយក្ដី ប៉ុន្តែនេះគឺជាលើកទីមួយដែលDEMO បានរៀបចំនៅប្រទេសតំបន់អាស៊ាន ដោយមានអ្នកចូលរួម១០ម៉ឺននាក់ឯណោះ។
លោក ល្វីស សហស្ថាបនិកក្រុមហ៊ុនបង្កើតកម្មវិធីហ្គេមនៅកម្ពុជាឈ្មោះថា Osja Studios បានប្រើរយៈពេល៦នាទីដើម្បីបង្ហាញពីកម្មវិធីហ្គេមរបស់ខ្លួនឲ្យទស្សនិកជនចំនួន៦០០នាក់វាយតម្លៃ។
ក្នុងចំណោមអ្នកចូលរួមបង្ហាញទាំង៣៧នាក់ មានតែរូបលោកទេដែលជាបេក្ខជនមកពីប្រទេសកម្ពុជា។
លោកបានថ្លែងរបៀបដាក់ខ្លួនថា ការបង្កើតកម្មវិធីហ្គេមនៅប្រទេសកម្ពុជាពុំទាន់មានសកម្មភាពផុសផុល នៅទីផ្សារបច្ចេកវិទ្យានៅឡើយទេ។
លោកល្វីសបាននិយាយថា៖ «នៅកម្ពុជា ការបង្កើតកម្មវិធីហ្គេមគឺជារឿងមួយថ្មី ខណៈដែលនៅបណ្ដាប្រទេសផ្សេងគេមានយូរហើយ។ កម្មវិធីនេះគឺផ្ដោតទៅលើផលិតផលថ្មីប្រកបដោយភាពច្នៃប្រឌិត»។
ស្ថាបនិកកម្មវិធីហ្គេមរូបនេះក៏បានបង្ហាញនូវអាវយឺតពណ៌ខៀវដែលមានសរសេរអក្សរ និងនិមិត្តសញ្ញាថា Osja Studio ជាមួយនឹងឈ្មោះហ្គេម អាស្វា (Asva The Monkey) ដែលបានទាក់ទាញមនុស្សឲ្យលេងវាជាង១៣ម៉ឺននាក់ទូទាំងពិភពលោក។
នៅពេលដែលសួរថា តើក្នុងនាមជាជនជាតិខ្មែរមួយរូបដែលចូលរួមក្នុងកម្មវិធីប្រជុំអ្នកបច្ចេកវិទ្យា DEMO បែបនេះ លោកមានអារម្មណ៍ដូចម្ដេចដែរ? តើលោកមានអារម្មណ៍ដូចជាអ្នកតំណាងវិស័យបង្កើតកម្មវិធីហ្គេមម្នាក់របស់ប្រទេសជាតិខ្លួនទេ?
លោកបានរៀបរាប់ថា៖ «ពេលខ្លះ ខ្ញុំគិតថា យើងជាខ្មែរតែម្នាក់ឯងនៅកម្មវិធីនោះអ៊ីចឹង ខ្ញុំព្យាយាមណែនាំប្រទេសរបស់ខ្លួនឲ្យគេបានស្គាល់នៅលើឆាក។ ខ្ញុំក៏ព្យាយាមនិយាយភាសាខ្មែរខ្លះដែរ ដើម្បីឲ្យពួកគេស្គាល់ពីយើង»។
ជាមួយនឹងអ្នកឈ្នះ៤រូបទៀត លោកល្វីស នឹងធ្វើដំណើរទៅសហរដ្ឋអាមេរិកក្នុងខែតុលាដើម្បីចូលរួមកម្មវិធីនារដូវស្លឹកឈើជ្រុះឆ្នាំ២០១៣។
លោកបាននិយាយថា៖ «នៅអាមេរិក មានការបង្កើតបច្ចេកវិទ្យាថ្មីៗច្រើនណាស់ ខ្ញុំមិនចង់ប្រកួតប្រជែងជាមួយអ្នកណាទេ។ ខ្ញុំគ្រាន់តែព្យាយាមបង្ហាញគេនូវអ្វីដែលយើងមាន អ្វីដែលយើងធ្វើ និងអ្វីដែលយើងចង់ធ្វើប៉ុណ្ណោះ ព្រោះនៅអាមេរិកគេមានអ្វីៗគ្រប់យ៉ាងអស់ហើយ បើនិយាយពីបច្ចេកវិទ្យានោះ»។
ក្រៅពីដំណើរទៅចូលរួមកម្មវិធីខ្នាតអន្តរជាតិនេះ លោក ល្វីស ក៏មានគម្រោងរឹតតែគួរឲ្យរំភើបមួយទៀត នោះគឺការបោះទុនក្នុងវិស័យកម្មវិធីហ្គេមក្នុងវេបសាយបណ្ដាញទំនាក់ទំនងសង្គមដូចជាហ្គេម Candy Crush ជាដើម ហើយលោកក៏នឹងបង្កើតកម្មវិធីហ្គេមថ្មីមួយទៀតនៅប៉ុន្មានខែខាងមុខនេះ។
សម្រាប់បច្ចុប្បន្ន លោក ល្វីស បានបញ្ជាក់ថា កម្មវិធីហ្គេមរបស់លោកនឹងផ្សារភ្ជាប់ទៅនឹងបរិបទខ្មែរ។
អ្នកបង្កើតកម្មវិធីហ្គេមរូបនេះបានថ្លែងថា៖ «អ្វីដែលសំខាន់គឺខ្ញុំអាចបង្ហាញស្នាដៃហ្គេមដែលខ្ញុំបង្កើតឲ្យពិភពលោកបានឃើញ ហើយខ្ញុំក៏អាចស្គាល់អ្នកល្បីៗខាងផ្នែកបច្ចេកវិទ្យានេះជុំវិញពិភពលោកដែរ»៕
