12-May-2014, 2:19 PM
ទេសចរណ៍ / ចំនួនទស្សនា: 233
ក្រុងក្យូតូ : ក្រុមភ្ញៀវទេសចរជប៉ុន និងអន្តរជាតិយ៉ាងច្រើនកុះករនាំគ្នាដើរទៅកាន់ឧទ្យានជាប់ ឆ្នេរសមុទ្រហ៊ីតាឈីស៊ីសៃដ៍ (Hitachi Seaside Park) តំបន់ហ៊ីតាឈីណាកានៃប្រជុំកោះអ៊ីបារ៉ាគី ប្រទេសជប៉ុនដើម្បីទស្សនា និងស្រង់ក្លិនដ៏ក្រអូបឈ្ងុយឈ្ងប់របស់ផ្កាណេម៉ូភីឡា(Nemophila) ជាង៤,៥លានដើមដែលកំពុងតែរីកស្គុសស្គាយរហូតដល់ចុងខែឧសភានេះ។
ស្ថិត នៅក្បែរតំបន់ឆ្នេរខ្សាច់អាជីហ្គូរ៉ា ឧទ្យានដែលគ្របដណ្ដប់ដោយបុប្ផាចម្រុះពណ៌រីកបណ្ដាក់គ្នាទៅពេញមួយ ឆ្នាំនោះ គឺជាតំបន់ទេសចរណ៍ដ៏ទាក់ទាញបំផុតសម្រាប់ក្រុមភ្ញៀវទេសចរចូលចិត្ត ទេសភាពផ្កា។ ឧទ្យាននេះមានផ្ទៃដី៣,៥ហិកតា និងមានផ្កាច្រើនប្រភេទដុះពាសពេញឧទ្យានរាល់ឆ្នាំតែម្តង ជាពិសេសនៅអំឡុងខែមេសា និងឧសភាដែលចំរដូវផ្ការីក។
បុប្ផាទាំងនេះ បានក្លាយជាកម្រាលព្រំគ្របដណ្ដប់តំបន់កូនភ្នំដែលអាចឲ្យភ្ញៀវទេសចរ គយគន់ទេសភាពមហាសមុទ្រប៉ាស៊ីហ្វិកផងដែរ។
ដោយឡែកនៅអំឡុងខែ ឧសភានេះ វាជារដូវកាលរបស់បុប្ផាពណ៌ខៀវឈ្មោះថាផ្កាណេម៉ូភីឡា។
ដើមផ្កាជាង៤,៥លានដើមបានរីកបន្តគ្នាបង្កើតបានជាកម្រាលព្រំពណ៌ ខៀវស្រទន់លាតសន្ធឹងដាច់កន្ទុយភ្នែក ដែលអ្នកទេសចរបានឲ្យឈ្មោះថា «ជាទីឋានសុខដុមរមនារបស់បុប្ផាណេម៉ូភីឡា»។
